تعلیم کی ابتداء اپنے والد محترم کے پاس جامع مسجد نوشیرہ میں کی ، ناظرہ قرآن کریم پڑھنے کے بعد مدرسہ اشرف الامداد کامینڈہ میں داخل ہوگیے ، یہاں آپ نے حفظ قرآن کریم کا آغاز کیا ، مدرسہ انوار العلوم چوراہا امام نگر میں حفظ قرآن کریم کی تکمیل کی ، تجوید اور جماعت فارسی باب العلوم جعفر آباد دہلی میں پڑھی ۔ عربی اول سے عربی پنجم ششم تک معدن العلوم جھمراوٹ میں تعلیم حاصل کی ۔ مشکوٰۃ ، دورہ حدیث شریف اور تکمیل تفسیر دار العلوم دیوبند میں پڑھنے کا شرف حاصل کیا ۔ افتاء پڑھنے کے لیے مفتاح العلوم جلال آباد یوپی تشریف لے گیے اور ۲۰۰۷ میں فراغت حاصل کی ، تدریس کا آغاز مدرسہ رحیمیہ پہاڑی سے کیا ، یہاں سات سال خدمات انجام دینے کے بعد ۲۰۱۴ء میں اپنے مادر علمی معدن العلوم جھمراوٹ تشریف لے آئے ۔ یہاں آپ سے بہت اہم کتابیں وابستہ ہوئیں ، ان دنوں درجات علیا کے استاذ شمار کیے جاتے ہیں ۔ ہدایہ جیسی اہم اور مشکل کتابیں آپ کے زیر تدریس ہیں ، فقہ و فتاویٰ آپ کے دلچسپ موضوعات میں سے ہیں ، شرعی مجلس علاقہ میوات کے آپ رکن ہیں اور ہر ماہ اس کی مجالس میں شرکت فرماتے ہیں ۔