جامعہ معدن العلوم جھمراوٹ۔ میوات کے اداروں میں تعلیم و تربیت کی بہتر کارکردگی کے لحاظ سے بہت ممتاز و مشہور ادارہ ہے ، اس کا جائے وقوع قصبہ جھمراوٹ ہے جو ہریانہ کے ضلع نوح میں آتا ہے ، قصبہ جھمراوٹ کے شمال مشرق میں قصبہ پنگواں اور مغرب میں بڑکلی چوک مشہور مقامات ہیں ، فیروز پور جھرکہ یہاں سے قریباً پچیس کلو میٹر کی مسافت پر واقع ہے ۔ قصبہ جھمراوٹ بہت قدیم بستی ہے، کبھی یہ ایک قلعہ نما شہر تھا، آج بھی قلعے کی بوسیدہ فصیلیں اس کی عظمت رفتہ کو بیان کر رہی ہیں ۔ یہاں دارالقضا کا نظام بھی قائم رہا ، اس قصبے میں ایک بہت قدیم مدرسے کا سراغ ملتا ہے جسے تن کے گورے اور من کے کالے فرنگیوں نے ختم کر دیا تھا ، شاید اسی مدرسے کا فیضان اثر ہے کہ اللہ تعالی نے ۱۹۹۱ء میں بانی جامعہ حضرت مولانا محمد الیاس صاحب مد ظلہ کو ذریعہ بنا کر مدرسہ معدن العلوم کی ابتداء کرائی، اس ادارے پر شروع ہی سے اللہ رب العزت کا خاص فضل رہا اور بہت جلد یہ تعلیم و تربیت کے میدان میں وقت کے اربابِ حل و عقد علماء و اہل اللہ کی نظروں میں قابلِ اعتماد و مستحق ذکر جمیل بن گیا۔ دینیات کے ابتدائی درجات سے شروع ہوکر حفظ قرآن کریم اور فارسی و عربی درجات کی تعلیم میں مثالی ادارہ بن کر ابھرا ۔ جو کبھی ننا سا پودا تھا ، آج الحمدللہ تعلیم و تربیت کے مختلف مراحل سے گزرتے ہوئے ایک تناور درخت کی شکل اختیار کر چکا ہے ، اس درخت کی شاخیں اپنے آنگن سے تجاوز کر کے زمین پر پھیل رہی اور آسمان کو چھورہی ہیں ،اس کے فیض یافتگان ملک و بیرون ملک خدمات انجام دے رہے ہیں، معیار تعلیم و عمدہ تربیت سے شرف یاب ہونے کے لیے ہر سال شوال المکرم میں داخلے کے موقع پر طالبین علم بھاری تعداد میں یہاں کا رخ کرتے ہیں ، گنجائش نہ ہونے کی صورت میں انہیں واپس ہونا پڑتا ہے، ہر سال سات سو سے متجاوز طلبہ یہاں زیور تعلیم و تربیت سے آراستہ ہوتے ہیں ۔ طالبان علم کے علاوہ اطراف و اکناف میں دعوتی و اصلاحی سرگرمیاں بھی اس قابل ہیں کہ انہیں ذکر کیا جائے ، قرب و جوار کے دیہات میں مکاتب دینیہ بھی اس ادارے کی زیر نگرانی منظم شکل میں چھوٹے بچوں کے دماغ کو علم کی روشنی سے منور کر رہے ہیں۔

جامعہ اپنے تعلیمی و تربیتی کام کو مزید وسعت دینے کے لیے مستقبل میں بہترین منصوبے اور بلند عزائم رکھتا ہے ، جن میں دینی و عصری تعلیم کا مضبوط امتزاج و انتظام، علوم کمپیوٹر کی شمولیت ، درسگاہوں کی توسیع ، دار القرآن و دار الطعام کی علیحدہ عمارت کا انتظام وغیرہ چیزیں عزائم میں داخل ہیں ۔